Բռնի տեղահանված արցախցիների ժառանգությունը վաճառվում է զբոսաշրջիկներին

2023 թվականի սեպտեմբերին Ադրբեջանի ռազմական հարձակման հետևանքով ավելի քան 100,000 էթնիկ հայեր ստիպված եղան լքել Լեռնային Ղարաբաղը և հաստատվել Հայաստանում։ Թեև Արդարադատության միջազգային դատարանը պարտավորեցրել է Ադրբեջանին ապահովել մարդկանց անվտանգ վերադարձը, հայերը թողել են իրենց տները, վանքերն ու գերեզմանները, որոնք այժմ փոփոխվում կամ ոչնչացվում են, ինչը փաստագրվել է ուսումնասիրողների կողմից։

Զբոսաշրջությունն արցախյան հուշարձանների տարածքում

Տեղահանությունից կարճ ժամանակ անց հայկական քրիստոնեական սրբավայրերն ու տարածքները վերածվել են 5 աստղանի տուրիստական ուղղությունների։ Մասնավորապես, «Marriott Bonvoy Tours & Activities» ընկերությունն առաջարկել է շրջագայություններ դեպի Շուշի և Ստեփանակերտ (տուրի նկարագրության մեջ ներկայացնելով դրանք որպես Շուշա և Խանքենդի)՝ գրեթե չհիշատակելով հայ քրիստոնյաներին և նրանց վտարումը։ Հանրային քննադատությունից հետո ընկերությունը հեռացրել է այդ հայտարարությունը։

«Save Armenia»-ի բացահայտումները

«Save Armenia» կազմակերպության գործադիր տնօրեն, դոկտոր Փոլ Մյուրեյի հրապարակած զեկույցը ցույց է տվել, որ նմանատիպ տուրեր են վաճառվում նաև այլ հարթակներում։ Խնդրահարույց ցանկում ներառված են հետևյալ ընկերությունները.

• Expedia
• Travelocity
• Viator (որը պատկանում է Tripadvisor-ին)
• GetYourGuide

Այս համատեքստում The Christian Post պարբերականը հիշեցնում է քրիստոնյաներին Սուրբ Գրքի պատգամը հալածյալներին չմոռանալու վերաբերյալ.

«Խոսեք նրանց փոխարեն, ովքեր չեն կարող խոսել իրենց համար»