Ղարաբաղից տեղահանված որոշ ընտանիքներ բնակվարձի փոխհատուցում կստանան

Աշխատանքի և սոցիալական պաշտպանության նախարար Արսեն Թորոսյանը հայտնել է, որ Ղարաբաղից տեղահանված որոշ խմբեր կօգտվեն բնակարանի վարձավճարի մասնակի փոխհատուցման ծրագրից։ Աջակցությունը նախատեսված է այն ընտանիքների համար, որոնք հրաժարվել են բնակարանային ապահովման պետական ծրագրին մասնակցելու իրավունքից կամ չեղարկել են համապատասխան հավաստագիրը։

Ովքեր կարող են դիմել

Ըստ նախարարության տրամադրած տեղեկատվության, ծրագրից կարող են օգտվել 1-ից 3 հոգուց բաղկացած այն ընտանիքները, որոնք հերթագրված են պետական սոցիալական բնակարանային ֆոնդում բնակարան ստանալու համար։ Բացի այդ, ընտանիքի անդամները պետք է բավարարեն հետևյալ պայմաններից առնվազն մեկին․

• ունենան 1-ին կամ 2-րդ խմբի անժամկետ հաշմանդամություն,
• ունենան ֆունկցիոնալության ծանր կամ խորը սահմանափակում,
• լինեն 60 տարեկանից բարձր։

Նախատեսված է նաև տարիքային հատուկ շեմ։ Երկու անդամ ունեցող ընտանիքների դեպքում նրանց տարիքների գումարը պետք է լինի 115 և ավելի, իսկ երեք անդամի դեպքում՝ 175 և ավելի։

Դիմումների ընդունման կարգը

Հայտերն ընդունվում են առցանց եղանակով՝ https://housing.socservice.am/ հղումով։ Սակայն մինչև էլեկտրոնային դիմում ներկայացնելը, քաղաքացիները պարտադիր պետք է մոտենան Միասնական սոցիալական ծառայության տարածքային կենտրոն՝ պետական սոցիալական բնակարանային ֆոնդում հերթագրվելու նպատակով։