Մարդու իրավունքների հանձնաժողովի նախագահի ընտրությունն ԱԺ-ում լարված էր

Ազգային ժողովում «Հայաստան» խմբակցությունից Լիլիթ Գալստյանի՝ հանձնաժողովի նախագահի թեկնածության քննարկումն ուղեկցվել է իշխանական և ընդդիմադիր պատգամավորների սուր հակադարձումներով։ Իրավիճակը սրվել է այն բանից հետո, երբ ԱԺ փոխխոսնակ Վահագն Ալեքսանյանը ահաբեկչության փորձի մեջ մեղադրվող Բագրատ արքեպիսկոպոս Գալստանյանին նույնացրել է «Ալ-Ղաիդա»-ի ղեկավար Ուսամա բեն Լադենի հետ։

Բանավեճ և փոխադարձ մեղադրանքներ

Թեկնածու Լիլիթ Գալստյանն անմեղ է համարել հոգևորականին և գործով անցնող մյուս 17 անձանց՝ պնդելով, որ մեղադրանքները նպատակ ունեն լռեցնել քաղաքական հակառակորդներին, իսկ ձայնագրությունները մոնտաժված են։ Նա խիստ քննադատել է ԱԺ փոխխոսնակի արած համեմատությունը։

«...բացարձակապես կոռեկտ չի, և դուք նաև վիրավորում եք ինձ՝՝ որպես Հայ Առաքելական եկեղեցու հավատավոր հավատացյալի»,- նշել է Լիլիթ Գալստյանը։

Ի պատասխան՝ Վահագն Ալեքսանյանն ասել է, որ հոգևորականն իրեն պահում է մոջահեդի պես և վիրավորում է իր կրոնական զգացմունքները։

«Առանձնապես մեծ տարբերություն չեմ տեսնում էդ երկու անձանց մեջ...»,- հակադարձել է ԱԺ փոխխոսնակը։

Դաշնակցական Գեղամ Մանուկյանը կոչ է արել չափավորել խոսքը, իսկ Լևոն Քոչարյանը հիշեցրել է, որ Ուսամա բեն Լադենի գործողություններից զոհվել է գրեթե 3 հազար մարդ, մինչդեռ իշխող «Քաղաքացիական պայմանագիր» կուսակցության քաղաքականության հետևանքով զոհվել է դրանից մոտ 2 հազար ավել մարդ։ Վեճին միացել է Մեսրոպ Մանուկյանը՝ հիշեցնելով երկրի ղեկավարի մասնակցությամբ Պռոշյանում Սոնա Մնացականյանի մահվան դեպքը՝ ի պատասխան Ալեքսանյանի այն դիտարկմանը, որ Ռոբերտ Քոչարյանը դեռ ազատության մեջ է։

Քաղաքական հալածանքների շուրջ քննարկում

Լիլիթ Գալստյանն իր ելույթում բարձրաձայնել է երկրում առկա խնդիրների, այդ թվում՝ ոստիկանական ուժի անհամաչափ կիրառման, դատարանների կախվածության և խոսքի ազատության սահմանափակումների մասին։ Նա նախընտրական շրջանում Իգոր Սարգսյանի, Սամվել Կարապետյանի, Չալաբյանի, Թևանյանի և Ծառուկյանի նկատմամբ կալանավորումները որակել է որպես քաղաքական ճնշումներ։

«Քաղաքացիական պայմանագրից» Ալխաս Ղազարյանը պահանջել է ապացույցներ միջազգային կառույցներից առ այն, որ Հայաստանում կան քաղհալածյալներ։

«Ձեր իշխանության օրոք է փաստվել, որ Հայաստանում եղել են քաղբանտարկյալներ: Համենայն դեպս, նման փաստ հիմա դուք չեք կարող ներկայացնել»,- նշել է Ղազարյանը։

Ընդդիմադիր Աննա Գրիգորյանն էլ Նիկոլ Փաշինյանին մեղադրել է երկակի ստանդարտների կիրառման մեջ, իսկ Արփինե Դավոյանը քննադատել է Գալստյանին՝ կուսակրոնության ուխտը խախտած անձանց պաշտպանելու համար։

Այլ հանձնաժողովների թեկնածուները

Խորհրդարանում պետք է կայացվի բոլոր 12 հանձնաժողովների նախագահների ընտրության որոշումը։ Ընդդիմության թեկնածուներն առանց իշխող ուժի ձայների չեն կարող ընտրվել։ Հայտնի է նաև, որ Առողջապահության հարցերի հանձնաժողովի նախագահի պաշտոնում առաջադրվել է Լուսինե Բադալյանը, իսկ Եվրոպական ինտեգրման հանձնաժողովում «Ուժեղ Հայաստան»-ն առաջադրել է արցախցի Արեգա Հովսեփյանին։