Ցեղասպանությունը վերապրածի թոռը խոսել է քաղաքական խոչընդոտների մասին

Ստեփան Փեչդիմալջիի պապը ծնվել է 1900 թվականին Յոզղատում: Երբ նա 15 տարեկան էր, թուրք զինվորականները տարան նրա հորն ու եղբորը, որոնց այլևս ոչ ոք չտեսավ։ Մայրը թաքցրել է տղային, ով հետագայում փախել է Հալեպ (Սիրիա), ապա հաստատվել Եգիպտոսում։ Այնտեղ նա ամուսնացել է Սմյուռնիայից (ներկայիս Իզմիր) գաղթած իր ապագա կնոջ հետ։ Ակտիվիստի խոսքով՝ պապն իրեն սովորեցրել է երբեք չատել թուրքերին, քանի որ մեղավորը կառավարությունն է, իսկ հասարակությանը ճիշտ պատմություն չեն դասավանդել։

Քաղաքական շահեր և ճանաչման գործընթաց

Ըստ նրա, Թուրքիան մեկ դար շարունակ խոչընդոտել է ցեղասպանության ճանաչմանը, ինչի հետևանքով միայն մոտ 35 պետություն (այդ թվում՝ Ֆրանսիան) է այն պաշտոնապես ընդունել։ Փեչդիմալջին թերահավատորեն է վերաբերվել Իսրայելի արտգործնախարարի՝ ճանաչման մասին հայտարարությանը, համարելով դա Թուրքիայի դեմ ուղղված քաղաքական քայլ։ Իսրայելի խորհրդարանն ի վերջո անորոշ ժամանակով կասեցրեց քվեարկությունը, ինչը պայմանավորված էր Ադրբեջանի ճնշումներով։ Իսրայելն իր նավթի մոտ 50 տոկոսը ստանում է Ադրբեջանից, որն էլ ռազմավարական դիրք է զբաղեցնում Իրանի սահմանին։

Իրական ճանաչումն ենթադրում է գործողություններ

Ամերիկահայ գործիչը շեշտում է, որ միայն հայտարարությունները բավարար չեն։ Որպես օրինակ նա հիշատակում է ԱՄՆ-ի քայլերը։

«Երբ Ջո Բայդենը ճանաչեց ցեղասպանությունը, դա հիանալի էր։ Բայց հետո նա թույլ տվեց Ադրբեջանին 120,000 հայերի էթնիկ զտում իրականացնել», - նշել է նա «RFI»-ին տված հարցազրույցում:

Ադրբեջանը, փորձելով վերաշարադրել պատմությունը, ոչնչացնում է հայկական եկեղեցիներն ու հուշարձանները, իսկ երկրի ղեկավարը Հայաստանն անվանում է «արևմտյան Ադրբեջան»։ Փեչդիմալջին հավելում է, որ ամեն տարի ապրիլի 24-ին ԱՄՆ-ի տարբեր վայրերում երիտասարդությունը ոգեկոչում է 1.5 միլիոն զոհերի հիշատակը, որպեսզի ցույց տա, որ առանց գործնական քայլերի «այլևս երբեք» արտահայտությունն իմաստազրկվում է։