Դպրոցներում նոր ուսումնական տարվա փոփոխությունները քննարկվել են Երևանում

ԿԳՄՍ նախարարի տեղակալ Արաքսիա Սվաջյանի խոսքով, հանրակրթության պետական չափորոշիչն այս տարի կներդրվի նաև 12-րդ դասարանում։ Փոփոխություններ են նախատեսվում նաև նախագծային աշխատանքներում, որտեղ հիմնական շեշտը դրվելու է բովանդակության և աշակերտի ձեռք բերած հմտությունների վրա։

«Չպետք է մոռանանք, որ նախագծային ուսուցումը միջոցառման պլանավորում չէ», - նշել է Արաքսիա Սվաջյանը։

Նոր առարկաներ և գնահատման փոփոխություններ

Ուսումնական ծրագրում ավելանում են նոր ուղղություններ։ Մասնավորապես, 5-րդ և 10-րդ դասարաններում «Առողջ ապրելակերպ» և «Անվտանգ կենսագործունեություն» ուղղությունները կդառնան առանձին առարկաներ։ Ընդ որում, 11-րդ դասարանում անվտանգությանն առնչվող բաղադրիչը կանցկացվի ամառային ճամբարի միջոցով։ Որոշ առարկաների, այդ թվում՝ «Արհեստ և արվեստ» և «Անվտանգ կենսագործունեություն և առողջ ապրելակերպ» ուղղություններով այլևս չի կիրառվի միավորային գնահատում, փոխարենը կտրվեն բնութագրիչներ։

Ավագ դպրոցում, մասնավորապես 12-րդ դասարանի երկրորդ կիսամյակում, աշակերտների համար ավելի ճկուն պայմաններ կստեղծվեն։ Նրանք կկարողանան մասնակցել տարբեր նախագծերի և խմբակների՝ կրեդիտներ վաստակելու համար, ինչը կօգնի նախապատրաստվել քննություններին և նվազեցնել կրկնուսույցների կարիքը։ Բացի այդ, դասագրքեր չունեցող առարկաների, ինչպիսիք են «Կենսաբանություն» կամ «Հայաստանի պատմություն», ստեղծվել են հատուկ ուղեցույցներ։

Վիճակագրական տվյալներ և արդյունքներ

Անդրադարձ է կատարվել նաև կրթությունից դուրս մնալու ռիսկերին և աշակերտների առաջադիմությանը։ Նախորդ ուսումնական տարում նման ռիսկի տակ է եղել 1 287 երեխա, որոնցից փաստացի ուսումը կիսատ է թողել 248 սովորող։ Միևնույն ժամանակ, դրական միտումներ կան ուշ դպրոց ընդունվածների շրջանում. 469 աշակերտներից 93 տոկոսը վաստակել է 4-ից 10 միավոր, իսկ մոտ 47 տոկոսը գրանցել է 8 կամ 9 միավոր։

Խորհրդակցության ընթացքում հայտնի է դարձել նաև, որ Երևանում այս տարի փորձնական կերպով կգործարկվի «Դպրոցական սնունդ» ծրագիրը՝ սկսելով նորակառույց կրթարաններից։