Էմին Օհանյանը բրոնզե մեդալ է նվաճել Եվրոպայի Մ-20 առաջնությունում

Շախմատի Եվրոպայի մինչև 20 տարեկանների առաջնությունում գրոսմայստեր Էմին Օհանյանը 9 հնարավորից վաստակել է 6,5 միավոր: Նա բաժանել է 2-ից 5-րդ հորիզոնականները և լրացուցիչ ցուցանիշների հաշվարկով գրավել 3-րդ տեղը՝ արժանանալով բրոնզե պարգևի:

Տղամարդկանց մրցաշարի լավագույն տասնյակը

Հայաստանի ևս երեք ներկայացուցիչներ տեղ են գտել առաջնության լավագույն տասնյակում: Միջազգային վարպետներ Ալեքս Սահակյանն ու Վահե Սուքիասյանը, ինչպես նաև ՖԻԴԵ-ի վարպետ Ռուդոլֆ Փաշիկյանը վաստակել են 6-ական միավոր՝ համապատասխանաբար զբաղեցնելով 6-րդ, 7-րդ և 8-րդ հորիզոնականները: Ընդ որում, Ռուդոլֆ Փաշիկյանը մրցաշարի ընթացքում նաև լրացրել է միջազգային վարպետի իր երկրորդ նորման:

Հայաստանի մյուս մասնակիցները գրանցել են հետևյալ արդյունքները.

• Միջազգային վարպետներ Ռոբերտ Փիլիպոսյանը և Արսեն Դավթյանը, ՖԻԴԵ-ի վարպետ Մանվել Առաքելյանը վաստակել են 5,5-ական միավոր:
• ՖԻԴԵ-ի վարպետ Էդգար Անդրեասյանի ակտիվում կա 4,5 միավոր:
• Վարպետության թեկնածու Ալեքսանդր Ավանեսյանը հավաքել է 3,5 միավոր:

Կանանց առաջնության ցուցանիշները

Աղջիկների մրցաշարում Հայաստանի լավագույն արդյունքը գրանցել է ՖԻԴԵ-ի վարպետ Նվարդ Հայրապետյանը: Նա վաստակել է 5,5 միավոր և բաժանել 9-11-րդ տեղերը՝ լրացուցիչ ցուցանիշներով հանգրվանելով 11-րդ տեղում: ՖԻԴԵ-ի վարպետներ Պոլինա Կոբակը և Անգելինա Միրաքյանն ունեն 5-ական միավոր, իսկ Էմմա Մխիթարյանը՝ 3 միավոր:

Առաջնության արդյունքներով Անգելինա Միրաքյանը և Նվարդ Հայրապետյանը էականորեն բարելավել են իրենց վարկանիշները՝ համապատասխանաբար 125,2 և 92,8 կետով: