Կադրային փոփոխություններ և հայ-հնդկական ռազմական քննարկումներ

Հայաստանում պաշտոնական այցով գտնվող Հնդկաստանի պաշտպանության քարտուղար Ռաջեշ Կումար Սինգհը հանդիպում է ունեցել ՀՀ պաշտպանության նախարար Սուրեն Պապիկյանի հետ։

Ռազմատեխնիկական համագործակցություն Հնդկաստանի հետ

Ինչպես նշել է նախարարն իր սոցիալական ցանցերում, հանդիպման ընթացքում շոշափվել են երկկողմ կապերին վերաբերող թեմաներ։

«Քննարկել ենք հայ-հնդկական պաշտպանական համագործակցությանը, այդ թվում՝ ռազմատեխնիկական համագործակցությանն առնչվող հարցեր»,- գրել է Սուրեն Պապիկյանը։

Հնդկական լրատվամիջոցների փոխանցմամբ՝ Հայաստանն ԱՄՆ-ի և Ֆրանսիայի հետ միասին մտնում է հնդկական պաշտպանական արտադրանքի երեք խոշորագույն գնորդների ցանկի մեջ։ Վերջին 4 տարիների ընթացքում կնքվել են մի շարք գործարքներ զինամթերքի, հրթիռների, ռադարների, գիշերային տեսանելիության սարքերի և զրահաբաճկոնների ձեռքբերման նպատակով։ Հայաստանը նաև հնդկական «Akash» ՀՕՊ համակարգերի առաջին օտարերկրյա գնորդն է։

Մատակարարումների ծավալներն ընդգրկում են հետևյալ ուղղությունները.

• 2022 թվականի սեպտեմբերի վերջին ստորագրվել է ավելի քան 250 միլիոն դոլարի պայմանագիր՝ ներառյալ 214 միլիմետրանոց «Pinaka» համակարգերի և հակատանկային հրթիռային համալիրների գնումը։
• 2023 թվականի աշնանը «Indian Defence Research Wing»-ը հայտնել է, որ օգոստոսի սկզբին «Bharat Forge LTD» ընկերությունը Հայաստանին է մատակարարել վեց «ATAGS» 155 միլիմետրանոց հաուբից։
• Այս գործարքի ընդհանուր արժեքը կազմում է 155.5 միլիոն դոլար, որը նախատեսում է 3 տարվա ընթացքում 90 հրետանային միջոցների մատակարարում։

Կադրային փոփոխություններ ՊՆ-ում

Զուգահեռաբար, պաշտպանության գերատեսչությունում տեղի են ունեցել կադրային փոփոխություններ։ Սուրեն Պապիկյանը Ֆեյսբուքում հայտնել է իր խորհրդականներ Մելիքսեթ Պողոսյանի և Ռազմիկ Պետրոսյանի պաշտոնավարման ավարտի մասին, ովքեր այդ պաշտոնները զբաղեցնում էին 2022 թվականից։

«Մելիքսեթ Պողոսյանը և Ռազմիկ Պետրոսյանն ավարտել են պաշտպանության նախարարի խորհրդականի պաշտոնավարումը։ Շնորհակալություն եմ հայտնել նրանց ծառայության համար և պարգևատրել գերատեսչական մեդալներով»։