Կառավարության 5-ամյա ծրագրով նախատեսվում է հեռացնել Եկեղեցու պետին

ՀՀ Սահմանադրության 151-րդ հոդվածի համաձայն՝ կառավարության ձևավորումից հետո վարչապետը խորհրդարան է ներկայացնում գործադիրի ծրագիրը: Ազգային ժողովի կողմից դրա հավանության արժանանալուց հետո եռամսյա ժամկետում պետք է հաստատվի միջոցառումների 5-ամյա ծրագիրը, որն արդեն մշակված է և պատրաստվում է կառավարության նիստին:

Եկեղեցու բարենորոգման օրակարգը

Ըստ ծրագրի՝ հոգևոր անվտանգության ապահովումը և եկեղեցու բարենորոգումը դիտարկվում են որպես կենսական անհրաժեշտություն: Գլխավոր նպատակներից է բացառել կառույցի քաղաքականացումը և թույլ չտալ, որ արտաքին ուժերն այն օգտագործեն որպես հիբրիդային պայքարի գործիք: Այդ նպատակով նախատեսվում է եկեղեցին բերել կանոնական դաշտ:

Նախատեսվող հիմնական քայլերը

Կառավարության փաստաթղթում ամրագրված են հետևյալ գործողությունները.

• Հայաստանյայց Առաքելական Սուրբ Եկեղեցու փաստացի պետի հեռացում (հանգստի կոչում) և Կաթողիկոսական տեղապահի ընտրության կազմակերպում:
• Եկեղեցու նոր կանոնադրության ընդունում, որով կապահովվի հոգևորականների բարեվարքությունը և ֆինանսական թափանցիկությունը:
• Ամենայն Հայոց Կաթողիկոսի նոր ընտրության անցկացում՝ սահմանված ընթացակարգերով:

Ծրագրում առանձին կետով նշվում է նաև հոգևորականների սոցիալական կարգավիճակի մասին։ Փաստաթղթում նշված է.

«Կառավարությունը ձեռնամուխ է լինելու նաև հոգևոր ծառայողներին սոցիալական երաշխիքների պետական համակարգում ներառելուն»