Մոլդովան պահանջում է փոխել Fly One ավիաընկերության սեփականատերերին

Մոլդովայի ներդրումների ուսումնասիրման խորհուրդը (CEIISS) Fly One ավիաընկերությանը 90 օր ժամանակ է տվել սեփականատերերի կազմում կառուցվածքային փոփոխություններ իրականացնելու համար։ Պետական անվտանգության շահերի պաշտպանությամբ պայմանավորված այս որոշմանը նախորդել է ավիափոխադրողի գործունեության երկարատև վերլուծությունը։

Ուսումնասիրության ընթացքում դիտարկվել են Fly One-ի և դրա հայաստանյան դուստր ընկերության ֆինանսական գործարքներն ու ներդրումային կառուցվածքը։ Ըստ Խորհրդի՝ ավիաընկերությունը պահանջված տեղեկատվության մի մասը տրամադրել է «ոչ ամբողջ ծավալով»: Ուշադրության կենտրոնում է եղել նաև միջազգային պատժամիջոցների տակ գտնվող անձանց հետ ավիաընկերությունների ղեկավարության հնարավոր կապը։ Չնայած խիստ պահանջներին՝ CEIISS-ը վստահեցրել է, որ ուղևորների համար անմիջական փոփոխություններ չեն լինի, և ընկերությունը կշարունակի կանոնավոր չվերթերը։

Կապը հայկական շուկայի հետ

Մոլդովական Fly One-ին է պատկանում 2021 թվականին հիմնադրված «Ֆլայուան Արմենիա» ընկերության բաժնետոմսերի 46 %-ը։ Մնացած 54 %-ը տնօրինում են Հայաստանի քաղաքացիներ՝ ապահովելով «Ավիացիայի մասին» օրենքի պահանջը, ըստ որի օդանավ շահագործողի վկայական ունեցող կառույցի առնվազն 51 %-ը պետք է պատկանի տեղացիների։

Հայկական ավիափոխադրողի 50 %-ի սեփականատերն Էդուարդ Սուքիասյանն է, իսկ մնացյալ 4 %-ը գրանցված է գլխավոր տնօրեն Արամ Խաչատրյանի անունով։ Հատկանշական է, որ 2021-2022 թվականներին «Ֆլայուան Արմենիայի» գլխավոր տնօրենի պաշտոնը զբաղեցրած Միրչա Մալեկան ՀՀ իրավաբանական անձանց ռեգիստրում մինչ օրս նշված է որպես մոլդովական բաժնեմասի իրական շահառու։

Fly One-ի բաժնետերերը

2015 թվականին հիմնադրված և 2016-ին շահագործման վկայական ստացած մոլդովական Fly One-ը հավասարաչափ պատկանում է Մոլդովայի արդարադատության նախկին նախարար Վլադիմիր Չեբոտարի և քաղավիացիայի նախկին ղեկավար Միրչա Մալեկայի ընտանիքներին։

• 40 %-ի սեփականատերը Վլադիմիր Չեբոտարի կինն է՝ Մարիա Չեբոտարին, 10 %-ը պատկանում է նրա քրոջը՝ Մարիանա Տաբույկեին։
• Մյուս 40 %-ը գրանցված է Միրչա Մալեկայի նախկին կնոջ՝ Ինա Մալեկայի, իսկ 10 %-ը՝ անձամբ Միրչա Մալեկայի անվամբ։

Նախկին նախարար Չեբոտարը ժամանակին համագործակցել է Մոլդովայի օլիգարխ Վլադիմիր Պլախոտնյուկի հետ: Տեղական լրատվամիջոցները հենց այս հանգամանքն են դիտարկում որպես պատժամիջոցների տակ գտնվող անձանց հետ կապի հիմք։