Ռուսաստանն ակտիվացնում է ճնշումը Երևանի վրա ՀԱՊԿ-ի ապագայի հարցով

Ռուս պաշտոնյաները պարբերաբար զգուշացնում են Երևանին ՀԱՊԿ-ի հետ կապված հնարավոր պատժամիջոցների մասին: Ակնկալվում է, որ Հայաստանի հարցը կքննարկվի նոյեմբերին Մոսկվայում նախատեսված դաշինքի առաջնորդների նիստում:

Մոսկվայի պահանջները

Ռուսաստանի փոխարտգործնախարար Միխայիլ Գալուզինը պնդում է, որ Հայաստանը պարտավոր է վճարել կազմակերպության անդամավճարը, անգամ եթե բոյկոտում է աշխատանքները: Ըստ նրա՝ կանոնադրությունը պետք է բարեխղճորեն կատարվի բոլորի կողմից: Միաժամանակ, դաշինքի գլխավոր քարտուղար Թալաթբեկ Մասադիկովը նշել է, որ Երևանի հետագա մասնակցության հարցը պետք է լուծվի ողջամիտ ժամկետներում:

Մոսկվան վկայակոչում է կանոնադրության այն դրույթը, ըստ որի հնարավոր է երկրի անդամակցության դադարեցում առանց նրա համաձայնության, եթե պարտավորությունները տևականորեն չեն կատարվում: Նշվում է նաև, որ Երևանը դեռևս կառույցից պաշտոնապես դուրս գալու գործընթաց չի նախաձեռնել:

Իշխանության և ընդդիմության մոտեցումները

«Քաղաքացիական պայմանագրի» ներկայացուցիչ Արթուր Հովհաննիսյանը հիշեցնում է, որ դաշինքը չի ճանաչել Հայաստանի սահմանները և գործնականում չի կատարել պարտավորությունները 21 և 22 թվականների հարձակումների ժամանակ: Պատգամավորի խոսքով՝ Երևանում մտահոգված չեն պատժամիջոցների հնարավոր սցենարով:

«Դե ֆակտո մենք որևէ հարաբերություն հողի վրա գործնականում ՀԱՊԿ-ի հետ չունենք: Այսինքն՝ ՀԱՊԿ-ը չի մեր անվտանգության երաշխավորը», - նշել է Արթուր Հովհաննիսյանը:

Ընդդիմադիր պատգամավոր Էդգար Ղազարյանն էլ պնդում է, որ կանոնադրության մեջ հարաբերությունների «սառեցված» ռեժիմ գոյություն չունի: Նա քննադատում է իշխանություններին միջազգային կառույցների հետ անտեղի խնդիրներ ստեղծելու համար և արդարացնում է ռազմական բլոկի դիրքորոշումը սահմանների ճանաչման հարցում:

«ՀԱՊԿ-ը ո՞նց պետք է ճանաչի Հայաստանի սահմանները, եթե Հայաստանն ինքը պետք է իմանա իր սահմանները», - հայտարարել է Էդգար Ղազարյանը:

Դաշինքն ավելի վաղ հրաժարվել էր գնահատական տալ սահմանային իրավիճակին՝ պատճառաբանելով, որ այն սահմանազատված չէ: Դիտորդներ տեղակայելու առաջարկ արվեց միայն այն ժամանակ, երբ արդեն հայտնի դարձավ Եվրամիության մոնիթորինգային առաքելության ժամանման մասին: Հատկանշական է, որ կառույցի մյուս անդամները՝ Ղազախստանը, Բելառուսը, Տաջիկստանը և Ղրղըզստանը, ջերմ կապեր ունեն Ադրբեջանի հետ: