Գյուղատնտեսության 12% անկում և արտահանման խնդիրներ. վիճակագրություն

Ռուսական շուկայի սահմանափակումներին զուգահեռ, տարվա առաջին կեսին Հայաստանի գյուղատնտեսական ցուցանիշները նվազել են գրեթե 12 տոկոսով։ Պաշտոնական վիճակագրության համաձայն՝ այս իրավիճակը համընկել է պտուղ-բանջարեղենի ավելի փոքր բերքահավաքի հետ։

Իրացման խնդիրներ և գնանկում

Արմավիրի մարզի այգեգործները բողոքում են դեղձի իրացման անհնարինությունից, քանի որ մեկ կիլոգրամի դիմաց նրանց առաջարկում են ընդամենը 100 դրամ։ Շատերի պնդմամբ՝ բերքն արդեն թափվում է ծառերից։

«Ես երեկ պիտի հավաքեի դեղձը, չհավաքեցի, որովհետև ոչ մեկ չուզեց իմ դեղձը, ոչ մի չրագործ չի ուզում», - նշել է գյուղացիներից մեկը News.am-ի հետ զրույցում։

Մեկ այլ այգեգործ «Ազատություն» ռադիոկայանին փոխանցել է.

«15 տոննա թափել եմ, վաղն արդեն կլինի 30 տոննա»։

Հունվար-հունիս ամիսներին երկրում հավաքվել է գրեթե 120 միլիոն հատ ծաղիկ, ինչը նախորդ տարվա համեմատ ավելի է գրեթե 9 միլիոնով։ Սակայն մայիսից լոլիկի և ծաղկի արտահանումը գումարային տեսքով կիսով չափ կրճատվել է, ինչը հանգեցրել է գների անկման։ Ֆերմերները հայտնվել են ծանր կացության մեջ։

«Հիմա ինչ ունեմ, արդեն բանկրոտ ջերմոց ա, ես բանկրոտ եմ: Պիտի մեկը լինի, որ ասի՝ ով ինչ ունի...», - դժգոհել է գյուղատնտեսներից մեկը («Ազատություն»)։

Խնդիրներ ունեն նաև ձկնաբույծները. թարմ ձկան գինը հուլիսին տարեսկզբի համեմատ նվազել է գրեթե 12 տոկոսով։ Միաժամանակ, Ռուսաստանն արգելել է որոշ հայկական ալկոհոլային խմիչքների ներկրումը, թեև այս ապրանքատեսակների մասով գնանկում չի արձանագրվել։

Արտահանման վիճակագրություն և գործընկերներ

Առաջին կիսամյակում Հայաստանից արտահանվել է ընդհանուր առմամբ գրեթե 3.5 միլիարդ դոլարի ապրանք։ Չնայած սահմանափակումներին՝ Ռուսաստանը շարունակում է մնալ հիմնական առևտրային գործընկերը։ Արտահանման ուղղությունների պատկերը հետևյալն է.

• Ռուսաստան՝ ավելի քան 1.2 միլիարդ դոլար կամ ընդհանուրի շուրջ 36 տոկոսը (նախորդ տարվա համեմատ նվազել է 4.2 տոկոսով)։ Միայն հունիսին արտահանվել է գրեթե 200 միլիոն դոլարի ապրանք։
• Չինաստան՝ գրեթե 530 միլիոն դոլար կամ ընդհանուրի 15.3 տոկոսը (գրանցվել է կրկնակի աճ)։
• Եվրամիություն՝ ավելի քան կես միլիարդ դոլար կամ 15 տոկոսը (հունիսին արտահանվել է գրեթե 56 միլիոն դոլարի ապրանք)։

Դեպի Իրան և Վրաստան արտահանման ծավալները կրճատվել են երկնիշ թվերով։